Amateraniro ya Kabiri “HAGURUKA WUBAKE NK’ISHYANGA RIMWE”

Pastor Tonya yatangiye ashimira abantu batandukanye kubwo kwakirwa neza bidasanzwe mu Rwanda, ndetse ashima Imana kubw’igiterane nka Africa Haguruka nk’umurimo w’Imana muri iki gihugu. Avuga ko nubwo bwose u Rwanda rwaciye mu bibi bikomeye nka Jenoside ari nayo nkuru abantu bahoro bavuga, ariko ko igihe kigeze bakamenya n’ibyiza biri kuhabera.

Mu kwinjira mu ijambo ry’umunsi yatubwiye kuby’ingenzi bikenewe kwitabwaho mu gihe cyo kubaka witegura guhaguruka, harimo:

• Amatafari ahiye meza 
• Ibikoresho bitandukanye byo kubakisha
• Abakozi bari mu bumwe aribwo bumwe bwubaka, bahujwe n’intego imwe kandi bayobowe n’Imana
• Urufatiro, aho abantu bose baba bahuje uburenganzira, imyumvire mu gikorwa barimo.
• Inkingi wubakiraho zigereranywa n'abayobozi babayeho bayoboye mu mbyaro zitandukanye 
• Umwubatsi mukuru utanga umurongo kubandi

Icyanditswe
Nehemiya 6:1-3: “Bukeye babwira Sanibalati na Tobiya, na Geshemu Umwarabu n’abandi banzi bacu yuko nubatse inkike, kandi ko nta cyuho gisigaye kuri yo nubwo nari ntarakinga inzugi ku marembo.
2. Nuko Sanibalati na Geshemu barantumira, ngo nze duhurire mu kirorero kimwe mu byo mu gisiza cya Ono. Ariko bashakaga kungirira nabi.
3. Nanjye mbatumaho intumwa ndababwira nti “Ndakora umurimo ukomeye sinashobora kumanuka, nta mpamvu yo kwica umurimo ngo manuke mbasange.” ”

Ese iyo wicaye ahantu hasenyutse ukora iki? Urabireba ukabyirengagiza cyangwa uba nka Nehemiya wafashe icyemezo cyo guhaguruka akubaka ubwo ishyanga rye ryari bikeneye.
Nehemiya yahagurukije abantu bose ngo bafatanye bubake kugirango igisuzuguriro cyari kibariho kiveho.

Iyo twubaka hari ubwoko bw’abantu dukeneye:

• Abarota n'abashyira mu bikorwa inzozi
• Abadushyigikira
• Abanyomoza ibyo turimo gukora, bakadukosora

Imana yonyine niyo yonyine itanga imbaraga zo kubaka ibyasenyutse yonyine. Ibyiringiro ntibigomba kubura bitewe n’ibyo Imana ikora.

Ibintu bitatu twakwigira muri Nehemiya  6:1-3

• Umurimo ukomeye 
• Abarwana umurimo ukomeye 
• Ushyira inzira ahatari inzira

Iyo twubaka inkike kandi hari abo tutaba dukeneye: abaturangaza bakadukura mu murongo wo kubaka, abaduca intege ndetse n’abasenya ibyo twubatse.

Ibyago cyangwa amakuba atugwirira ntidukwiye gucika intege, tugomba kuvuga nka Nehemiya “Ndigukora umurimo ukomeye sinabasha kumanuka.” Nta sezerano ufite rikubwira ko kubaka byoroshye, ahubwo menya ko ufite umurimo ukomeye ugomba gukora.

Tugomba kubaka imidugudu yasenyutse, tugahaguruka tugakora, tugashyiraho ubukungu bushyitse, tugashaka ubutabera, kandi tukabikorera mu rukundo n’ubumwe. Tugomba kwikunda tugakunda n'abagenzi bacu, tukiga kuryoherwa  mu butunzi Uwiteka yahaye umugabane wacu.
Tugomba kwiga kwitoza kubaha Imana, tugomba kwihana kandi tugaca bugufi Imana ikatubabarira.

Igihe kirageze ngo Abanyafrica turekere gushaka ibinyoma bidutandukanya bituma tudakundana ahubwo tugasenyera umugozi umwe tugahaguruka tukubaka.